Minok di Lamban Datuk Muhammad (Kelas 3B)

Nama        : Oke Pajarli, S.Kom

Mapel        : Bahasa Lampung

Kelas         :3B

Tanggal     : 14/08/2024 (11.00-12.10)

 

Unit            : SD AL-AZHAR 1 BANDAR LAMPUNG

 

materi         : Minok di Lamban Datuk Muhammad

 

Tujuan        : Mampu menceritakan hoby masing-masing sesuai minat anak-anak

 

 Assalamualaikum warahmatullahi wabarakatuh,

Tabik pun........Selamat pagi anak-anak........

Api kabagh sanak-sanak sai sholeh ghik sholehah...

sihat seunyinni yu nak....

 

Alhamdulilah khani hinji, kham dapok betungga luwot dilom pelajaghan Bahasa Lampung. Semakung kham ngemulai pelajakhan di pagi hinji dang lupa bedu’a usahako sholat dhuha khik muroja’ah pai yu nak, nyin ilmu sai dikeni ulih gughu dapok kuti teghima sai helau.

Anak-anakku, pada peghtemuan ghani hinji gham haga pelajaghi tema 1 tentang ”Minok di Lamban Datuk Muhammad”, Semakung ngemulai pelajaghan. Kuti sediako buku ghik alat tulisni yu nak… Hunja pak gughu mapaghko mateghi singkat. Ti baca ghik ti pahami yu anak-anak pak gukhu.

 

 

Minok di Lamban Datuk Muhammad

Waktu libughan sekula, Amran jamo adikni Aminah belibugh di lamban datuk Muhammad. Beliau jama nyanyik lambanni di pekon Lumbok ghedik danau ghanau. Amran ghik Aminah yakdo umpu-umpuni Datuk Muhammad. Tiyan geghing ati ni mandi ghik nangui di pinggegh Way Ranau. Tiyan cakak peghahu motogh speedboatneghjang umbak Wai Ranau. Kekala tiyan nutuk jelema sai lagi nakop iwa pakai jaghing. Tiyan geghing minik di lamban ni Datuk Muhammad, ulah ya ghisok buceghita. Bingi hinji Datuk Muhammad buceghita sai judulni Pendekar Mata Pak Dan Si Pahit Lidah. Iya ngemulai ceghita ni :

“Di zaman tumbai hughik jelema sakti di Pekon Banding Agung Wai Ranau sai tekughuk hantaghan Sumatera Selatan jama Lampung Barat tanno. Ia selalu ngebila jelema kesusahan Julukni Mata Pak. Sebab ya sangun ngedok mata pak. Ghuwa dipudakni ghuwa di hantagha buwok ditundun huluni. Kenaloman ni mak ngedok sai nandingi, yakdo ilmu pencak kebatinan. Lamon hulun sai ghabai beniat jahat. Sebab mata pak mak geghing jama jelema sai jahat. Atau jama jelema sai mak patuh jama atughan sai helau.

Mak jawoh anjak jengan ni ughik munih pendekar sai sakti sai julukni Si Pahit Lidah. Si Pahit Lidah tikenal jamo kesaktianni, yakdo sumpah api gawoh sai diocapko Si Pahit Lidah mesti tejadi. Gegoh ia nyumpahi musuh-musuh ni jadi patung, waktu hina munih musuhni sina kaku beubah jadi patung batu. Lamon jelema sai ghabai jama ya, tiyan ghabai kena sumpah ni.

Suatu waktu pendekar Mata Pak betungga jama Si Pahit Lidah.tiyan ghuwa saling pungah ngeghasa paling sakti, uccukni tiyan ghuwa saling adu kesaktianni. Beghani-ghani tiyan telaga ngejajakko ilmu kesaktianni, kidang mak ngedok sai kalah. Tiyan ghuwa sangun jama-jama jelema sai nalom ghik sakti.

Uccukni tiyan ghuwa sepakat makai kumbang batang aren sai jadi alatni guwai netapko sapa sai paling sakti. Pendekar Mata Pak geleghan sai peghtama. Ya telukkup di bah pohon aren, segeluk kilat Si Pahit Lidah luccak mit puccuk pohon aren, di tetok ni pelepah kumbang aren lajeu ditayaghko adok badanni si Mata Pak, si Mata Pak selamat, ya dapok ngilak, ulah ya dapok ngeliyak kumbang aren sai di Layaghko jama Si Pahit Lidah, makai ghuwa matani sai wat di buwok tundun huluni.

Ghadu sina gileghan Si Pahit Lidah sai tilekkup di bah pohon aren. Si Mata Pak teghabang adok pucuk pohon aren ditetok ni pekepah kumbang aren, ghadu sina di tayaghko di badan Si Pahit Lidah. Si Pahit Lidah mati, kena tayagh kumbang aren sai ditayaghko Mata Pak. Mata Pak Lalang waya, ulah ia dapok ngalahko Si Pahit Lidah.

Kidang iya heghan ulih kesaktian Si Pahit Lidah sina. Iya pikeghapi benogh ma (lidah) ni Si Pahit Lidah sina pahik, mula ditinggulko telunjukni adok ma (lidah) ni Si Pahit Lidah, laju iya jilat uccuk telunjukni jeno. Iya mak ngingok bahwa racun Si Pahit Lidah jeno teghisop jama iya, uccukni pendekar Si Mata Pak tiwas munih, kena racun bisa Si Pahit Lidah sai teghisopni”.

Ghena ceghita Datuk Muhammad jamo uppeu-uppeuni. Amran jama Aminah ngucakko teghimakasih jamo datukni, tiyan ghuwa temen-temen geghing nengis ceghita sina.

 

 ===========================================================================

Ayo latihan 

1. Mit dipa Amran jama Aminah waktu libughan sekolah?

2. Ulah api tiyan ghuwa geghing minok di lambanni Datuk Muhammad?

3. Api judul ceghita Datuk Muhammad bingi hinji?

4. Anjak dipa asalni pendekar Mata Pak?

5. Ulah api iya dikenal jama julukan Si Mata Pak?

 

Kesimpulan :

Alhamdulillah pembelajaran hari ini berjalan dengan baik, aktif dan lancar. Tidak ada kendala apa pun saat mengajar dan anak-anak bisa memahami materi yang disampaikan.